Subh taa shaam sochtaa huuN maiN sau tere naam sochtaa huuN maiN..

Subh taa shaam sochtaa huuN maiN
sau tere naam sochtaa huuN maiN

ye jo ek taazah aag bhaRkii hai
is kaa anjaam sochtaa huuN maiN

saamne hai qalam bhii kaaGhaz bhii
aur paiGhaam sochtaa huuN maiN

tujh se is dil kaa jo ta’alluq hai
us kaa kuch naam sochtaa huuN maiN

aik shaam-e-firaaq Dhal bhii gayii
phir bhii har shaam sochtaa huuN maiN

kyaa sabab hai Gham-e-zamaana kaa!
laa zaraa jaam sochtaa huuN maiN

ab ko’ii fikr hii nahiiN “Baqi”
bas teraa naam sochtaa huuN maiN

Baqi Ahmadpuri